Breytt gjaldskrá afnotaleyfa og eftirlits hjá Reykjavíkurborg hefur tekið gildi. Breytingin felur meðal annars í sér heimild til að veita afslátt af gjöldum vegna ákveðinna viðburða á borgarlandi.
Breytingin var samþykkt á fundi borgarráðs en markmiðið með breytingunni er að efla menningar- og samfélagslíf í Reykjavík.
Samkvæmt gjaldskránni, sem skipt er upp í fimm flokka, eftir umfangi afnota og eðli þeirra, er nú heimilt að veita allt að 50% afslátt af afnotaleyfisgjaldi í tilteknum tilfellum. Breytingin nær til umfangsflokka 1a, 2 og 5 og á við um viðburði sem haldnir eru af óhagnaðardrifnum félögum, svo sem íþróttafélögum, og eru opnir almenningi.
Forsenda þess að afsláttur verði veittur er að fyrir liggi samkomulag um eftirlit, frágang og viðbrögð af hálfu viðburðarhaldara. Markmið með þessum breytingum er að draga úr þörf fyrir eftirlit af hálfu leyfisveitanda og tryggja að afnot borgarlands fari fram með öruggum og ábyrgum hætti.
Einfaldara ferli fyrir gjaldfrjálsa smærri viðburði og minniháttar afnot
Undir umfangsflokk 5 sem er gjaldfrjáls flokkur falla smærri verkefni sem hafa óveruleg áhrif á borgarlandið og krefjast takmarkaðs undirbúnings og eftirlits af hálfu leyfisveitanda. Undir þennan flokk falla minni viðburðir á borð við hlaup, hjólreiðakeppnir og tónleika, haldna af einstaklingum, félagasamtökum eða öðrum aðilum. Einnig geta minniháttar viðhalds- og framkvæmdaverkefni, sem hafa lítil áhrif á umferð eða aðgengi almennings, fallið undir þennan flokk.
Með þessari flokkun er leitast við að einfalda umsóknarferli og tryggja að gjaldtaka og eftirlit séu í samræmi við raunverulegt umfang og áhrif afnotanna.
Borgarland landsvæði sem tilheyrir Reykjavíkurborg
Afnotaleyfi veita tímabundna heimild til að nota borgarland fyrir margvísleg verkefni, svo sem viðburði, framkvæmdir eða rof á yfirborði. Markmið leyfanna er að tryggja öryggi vegfarenda, upplýsa íbúa og gesti um afnotin og stuðla að góðri umgengni um borgarlandið. Jafnframt er afnotaleyfum ætlað að vernda verðmæti eigna Reykjavíkurborgar með því að koma í veg fyrir óþarfa slit eða skemmdir á yfirborði og undirlagi sem geta rýrt gæði og verðmæti borgarumhverfisins.
Borgarland er samheiti yfir allt það landsvæði sem tilheyrir Reykjavíkurborg. Þar undir falla meðal annars götur, gangstéttir, stígar, torg og önnur opin svæði sem almenningur nýtir daglega.
Athugasemdir