LaToya Malcolm, sem tók þátt í Miss Universe Jamaica-keppninni árið 2024, er látin, aðeins 35 ára að aldri. Samtökin Miss Universe Jamaica greindu frá andláti hennar 18. júlí en dánarorsök hefur ekki verið gerð opinber.
„Við syrgjum fráfall LaToya Malcolm, sem tók stolt þátt í Miss Universe Jamaica-keppninni árið 2024. Hugur okkar er hjá fjölskyldu hennar, vinum og ástvinum. Hvíl í friði, LaToya. Þín verður ávallt minnst,“ sagði í tilkynningu samtakanna á Instagram.
Auk þátttöku sinnar í Miss Universe Jamaica sigraði Malcolm í Miss Jamaica Bikini International-keppninni árið 2024.
„Ég kann virkilega að meta alla ástina og stuðninginn frá vinum mínum og fjölskyldu,“ skrifaði hún á Instagram eftir sigurinn.
Hún tileinkaði föður sínum sigurinn, en hann lést fyrr sama ár.
„Elsku pabbi minn, herra Malcolm, þessi sigur var fyrir þig. Einkadóttir þín heldur áfram að gera þig stoltan. Ég veit að þú brosir til mín af himnum ofan.“
Malcolm starfaði einnig sem leikkona, sjónvarpskona og danskennari. Skömmu fyrir andlát sitt kom hún fram í morgunþættinum Smile Jamaica, þar sem hún sýndi danshæfileika sína.
„Rísið á fætur og brosið! Snemma morguns, dans og bros. Takk TVJ Smile Jamaica fyrir að bjóða mér,“ skrifaði hún á Instagram 3. júlí.
Í kynningarmyndbandi sínu fyrir Miss Universe Jamaica sagðist Malcolm hafa haft mikinn áhuga á ferðalögum, lestri og skoðunarferðum. Hún sinnti einnig sjálfboðastarfi þar sem hún aðstoðaði ungt fólk við starfsráðgjöf og atvinnuleit.
Fjölmargir hafa vottað fjölskyldu hennar samúð, þar á meðal núverandi Miss Universe Jamaica, Gabrielle Henry.
„Eftir að hafa upplifað missi og erfiðleika í gegnum árin hef ég lært hversu mikilvægt það er að staldra við og minnast þeirra sem lifðu lífinu af ástríðu, óhrædd og af heilum hug. Að heyra af andláti LaToya er mikill missir fyrir fjölskyldu hennar og allt samfélagið á Jamaíka. Áhrif hennar munu lifa áfram og rödd hennar gleymist aldrei,“ skrifaði Henry.
Athugasemdir