Fyrrverandi ritstjórinn og fjallaleiðsögumaðurinn Reynir Traustason varar við því sem hann segir vera alvarlega öryggisgalla á útsýnispallinum á Bolafjalli ofan Bolungarvíkur.
Í Facebook-færslu segir Reynir að glerplötur sem mynda öryggishindrun á pallinum séu bæði farnar úr skorðum og sprungnar.
„Glerplötur sem skilja á milli lífs og dauða á útsýnispallinum á Bolafjalli eru farnar úr skorðum og þær krosssprungnar,“ skrifar hann.
Bætir hann við:
„Spýtum hefur verið klambrað við þær, væntanlega til að skapa öryggiskennd“.
Reynir bendir á gríðalega langt fall sé frá pallinum.
„Um 670 metra lóðrétt fall er frá pallinum. Ferðamenn sem leið áttu um voru gáttaðir á því kæruleysi sem þarna á sér stað,“ skrifar hann.
Í lok færslunnar vekur hann einnig athygli á því að gestir greiði aðgangseyri að útsýnispallinum.
„Ferðamenn eru rukkaðir fyrir að mæta á staðinn,“ segir Reynir Traustason.
Athugasemdir