Níu ára stúlka sem lést eftir að hafa fundist alvarlega slösuð í bænum Arbroath í Skotlandi hefur verið nafngreind sem Minnie Merriman.
Stúlkan fannst alvarlega slösuð á Elliot-iðnaðarsvæðinu skömmu eftir miðnætti á mánudag. Hún var flutt í skyndi á Ninewells-sjúkrahúsið í Dundee en lést af áverkum sínum skömmu eftir komuna þangað.
Þrír aðrir voru einnig fluttir á sjúkrahús en voru útskrifaðir síðar sama dag.
Lögreglan hefur handtekið 35 ára gamlan mann og ákært hann vegna dauða stúlkunnar. Að sögn lögreglu þekktust Minnie og maðurinn og er hann væntanlegur fyrir dóm í dag.
Lögreglan segir að fjölskylda Minnie sé frá Vestur Jórvíkurskíri á Englandi og hafi verið í útilegu á svæðinu þegar atvikið átti sér stað.
Í yfirlýsingu frá fjölskyldunni segir:
„Við erum niðurbrotin vegna missis okkar á ástkæru Minnie Moo, sem var einstök, falleg og hugrökk stúlka. Fjölskyldan biður um að friðhelgi einkalífs okkar verði virt á þessum afar erfiða tíma.“
Rannsókn á andláti Minnie stendur enn yfir.
Vitni sagði að það hefði ekið fram hjá fjölskyldunni nokkrum klukkustundum áður en stúlkan lést og séð hana matreiða á útilegugaseldavél.
Önnur kona sagðist hafa séð tjald reist við hlið bifreiðar og lýsti aðstæðunum sem „undarlegum“.
Iðnaðarsvæðið þar sem stúlkan fannst liggur á milli íbúðahverfis, verslunarsvæðis og strandarinnar í Arbroath og er jafnan fjölfarið yfir daginn. Tvö tjaldvagnasvæði eru í nágrenninu en hvorugt þeirra hefur kannast við að fjölskyldan hafi gist þar áður en atvikið átti sér stað.
Íbúi á svæðinu, Bill Smith sagði að málið hefði komið öllum í opna skjöldu.
„Þetta er ótrúlegt. Þetta er það eina sem fólk talar um í dag því þetta er svo sorglegt. Enginn virðist vita hvað gerðist. Það er hryllilegt að svona ung stúlka hafi misst lífið hér,“ sagði hann.
Lögreglan hefur girt af stórt svæði þar sem rannsókn fer fram. Meðal annars hefur blár Peugeot-bíll verið innsiglaður og tæknideild lögreglu komið upp rannsóknartjaldi á vettvangi.
Mike Ness, rannsóknarlögreglumaður hjá sérsveit sem rannsakar alvarleg sakamál, sagði að hugsanir lögreglunnar væru hjá öllum sem hefðu orðið fyrir áhrifum af atburðinum, sérstaklega fjölskyldu Minnie.
Hann sagði lögreglu verða áfram með viðveru á svæðinu á meðan rannsókninni vindur fram og hvatti alla sem kynnu að búa yfir upplýsingum til að hafa samband við lögreglu.
Athugasemdir