Jakob Birgisson, grínisti og fyrrverandi aðstoðarmaður dómsmálaráðherra, viðurkennir að hafa áreitt samstarfskonu sína kynferðislega á starfsmannaskemmtun dómsmálaráðuneytisins. Málið kom upp á yfirborðið eftir að skjáskot með ásökunum konunnar fór í dreifingu á samfélagsmiðlum. Jakob lét af störfum í vor og segist í kjölfarið hafa hætt allri áfengisneyslu.
Viðurkennir ósæmilega snertingu
Í skriflegu svari til Vísis staðfestir Jakob atvikið. Hann segir að það hafi átt sér stað á skemmtun á vegum ráðuneytisins fyrr í vetur. Samkvæmt heimildum átti fögnuðurinn sér stað á skemmtistaðnum Bullseye við Snorrabraut.
„Þar átti ég í samskiptum við samstarfskonu mína og snerti hana á ósæmilegan hátt. Ég bað hana innilega afsökunar á þessu atviki og taldi málinu lokið,“ segir Jakob.
Sagður hafa hætt vegna áreitninnar
Yfirlýsing Jakobs kemur í kjölfar þess að skjáskot frá konunni fór í dreifingu. Í því segir konan beinum orðum að Jakob hafi ekki hætt í ráðuneytinu eingöngu til að snúa sér aftur að gríninu, heldur hafi hann áreitt hana kynferðislega í vinnunni.
Jakob starfaði sem aðstoðarmaður Þorbjargar Sigríðar Gunnlaugsdóttur dómsmálaráðherra í rúmt ár. Í lok mars tilkynnti hann opinberlega að hann væri að hætta til að einbeita sér aftur að uppistandi.
Ekki náðist í Jakob við vinnslu fréttarinnar.
Athugasemdir