Séra Pétur Ragnhildarson hefur verið ráðinn prestur við Lindaprestakall í Kópavogi og Halldór Elías Guðmundsson í stöðu djákna við Austfjarðaprestakall en Þjóðkirkjan greinir frá þessu.
Pétur er fæddur árið 1993 og lauk BA-prófi í guðfræði árið 2017 og embættisprófi í guðfræði tveimur árum síðar. Árið 2021 lauk hann MA-prófi í guðfræði og hefur auk þess lokið diplómanámi í sálgæslu og námskeiði í sáttamiðlun.
Pétur hefur mikla reynslu af barna- og unglingastarfi innan kirkjunnar og var vígður til prestsþjónustu árið 2020. Hann starfaði meðal annars í Fella- og Hólakirkju og Guðríðarkirkju áður en hann var skipaður prestur í Breiðholtsprestakalli árið 2022. Pétur er giftur Alexöndru Ýr Auðunsdóttur og eiga þau tvo syni.
Halldór Elías er fæddur árið 1973 og lauk BA-gráðu í guðfræði árið 1997. Hann var vígður til djáknaþjónustu sama ár og hefur starfað að kristilegu barna- og unglingastarfi í meira en 35 ár.
Halldór hefur meðal annars starfað á Íslandi og í Bandaríkjunum og var vígður til prestsþjónustu hjá United Church of Christ árið 2021. Eiginkona hans er Dr. Jenný Brynjarsdóttir og eiga þau tvö uppkomin börn.
Athugasemdir