Hundar geta veikst alvarlega og jafnvel dáið eftir að hafa innbyrt nikótínpúða sem hent hefur verið á víðavangi. Íslenski fjárhundurinn Kátur var hætt kominn á dögunum eftir að hafa étið slíkan púða, en dýralæknar vara sterkt við eitrunaráhrifum nikótíns og sætuefna á borð við xylitol.
Eigandi Káts, Hafdís Brynja Guðmundsdóttir, segir í frétt á RÚV að atvikið hafa átt sér stað þegar fjölskyldan var í heimsókn þar sem hundurinn fékk að hlaupa um í lokuðum garði. Garðurinn liggur að gangstétt þar sem algengt er að fólk fleygi notuðum púðum. Þegar fjölskyldan bjóst til brottfarar fór að bera á óvenjulegri hegðun hjá Káti.
Skömmu síðar versnaði líðan hans til muna. Hann átti erfitt með að standa í fæturna og byrjaði að æla. Fjölskyldan áttaði sig fljótt á alvarleika málsins og flýtti sér með hann á dýraspítala, þar sem dælt var upp úr honum. Hafdís segir að það hafi verið tvísýnt með líf hundsins og ljóst sé að hann hefði dáið ef hann hefði ekki fengið tafarlausa læknishjálp. Kátur náði að endingu fullri heilsu en eigendur hans eru nú mun meira á varðbergi þar sem nikótínpúðar sjást víða á förnum vegi.
Halldóra Hrund Guðmundsdóttir, dýralæknir á Dýraspítalanum í Víðidal, staðfesti við RÚV að reglulega komi tilfelli til þeirra þar sem grunur leikur á nikótíneitrun hjá hundum, og grunur sé um að dýr hafi dáið af þeim sökum. Hún útskýrir að hundar hafi mun minna þol fyrir nikótíni en fólk. Eitrunin lýsir sér fyrst með uppköstum og niðurgangi en getur fljótt þróast yfir í alvarlegan skjálfta og krampa.
Dýralæknirinn bendir jafnframt á að nikótínið sé ekki eina hættan sem fylgir púðunum. Þeir innihalda oft gervísætuefnið xylitol, sem er bráðhættulegt hundum og getur valdið lífshættulegu blóðsykursfalli og lifrarskemmdum. Halldóra skorar á almenning að sýna ábyrgð og hætta að henda púðunum á víðavangi, enda sé um stórhættulegan úrgang fyrir dýralíf að ræða.
Athugasemdir