Frekari niðurskurður er fram undan hjá Reykjavíkurborg og telur Hildur Björnsdóttir borgarstjóri mjög líklegt að uppsagnir verði á fleiri sviðum borgarinnar. Engar endanlegar ákvarðanir hafi þó verið teknar en ljóst er að niðurskurðarhnífur borgarstjóra er ennþá á lofti.
Þetta kemur fram í viðtali við Hildi á Vísi. Þar segir hún hagræðingarhóp borgarinnar halda áfram störfum og að næstu svið séu nú tekin til skoðunar. Samhliða sé unnið að fjárhagsáætlun Reykjavíkurborgar fyrir næsta ár, sem verður kynnt í byrjun nóvember.
„Við erum auðvitað að skoða tillögur með sviðsstjórunum okkar að því hvar við getum sparað og dregið saman seglin, þannig að já, það er meira fram undan,“ segir Hildur í samtali við Vísi.
Aðspurð hvort uppsagnir verði á mörgum sviðum svarar hún að það sé „mjög líklegt“. Greiningarvinna standi þó enn yfir og engar ákvarðanir liggi fyrir. Hagræðing geti einnig falist í því að verkefni verði lögð niður eða rekstur endurskipulagður með öðrum hætti.
Hildur nefnir jafnframt veikindi starfsfólks sem eitt af stærri viðfangsefnum í rekstri borgarinnar. Veikindahlutfall sé mjög hátt og segir hún kostnað Reykjavíkurborgar vegna veikinda hafa numið hátt í sjö milljörðum króna á ári. Við því þurfi að bregðast.
Í viðtalinu er Hildur einnig spurð út í andrúmsloftið í Ráðhúsinu í ljósi fyrirhugaðrar hagræðingar. Hún segist finna til með starfsfólki enda geti óvissa um störf verið erfið.
„Það er auðvitað ekki notalegt að vita að það sé verið að hræra í pottunum og velta við hverjum steini og auðvitað verður fólk óöruggt með sitt,“ segir Hildur. Markmiðið sé að vinna hratt en vandað og taka ákvarðanir fljótt þegar forsendur þeirra liggi fyrir svo starfsfólk fái vissu um stöðu sína.
Hildur segir stemninguna í Ráðhúsinu engu að síður almennt góða og að vel hafi verið tekið á móti henni. Starfsfólk vinni hratt að breytingum og mikið af góðu fólki starfi hjá borginni.
Athugasemdir