„Við munum höfða mál gegn ríkinu“

Kristján Loftsson, for­stjóri Hvals hf., seg­ist ætla að höfða mál gegn íslenska rík­inu verði bann við hval­veiðum lög­fest hér á landi. Þetta segir hann í sam­tali við AFP-frétta­stof­una.

Ísland er eitt þriggja ríkja í heim­inum þar sem hval­veiðar eru enn stund­aðar en stjórn­völd hafa boðað að frum­varp sem gæti leitt til banns við veið­unum verði lagt fram í febr­úar á næsta ári.

Kristján, sem er 83 ára, segir að Hvalur muni að sjálf­sögðu fara að lögum verði bann sam­þykkt. Fyr­ir­tækið muni hins vegar leita réttar síns gagn­vart rík­inu.

„Við munum auð­vitað ekki veiða hval,“ segir Kristján. „Við munum höfða mál gegn rík­inu.“

Hann telur að mögu­leg mál­sókn gæti reynst rík­inu kostn­að­ar­söm og seg­ist þess vegna ekki hafa miklar áhyggjur af því að bannið verði að veru­leika. Sam­bæri­legar hug­myndir hafi áður komið fram án þess að þær hafi orðið að lögum.

„Ég hef engar áhyggjur af þessu. Ég er nokkuð viss um að þetta verði aldrei að veru­leika,“ segir Kristján.

Tvær meg­in­á­stæður liggja að baki því að stjórn­völd skoða bann við hval­veiðum, sam­kvæmt atvinnu­vega­ráðu­neyt­inu. Annars vegar sé um að ræða efna­hags­leg sjón­ar­mið, þar sem arð­semi veið­anna sé tak­mörkuð, og hins vegar sjón­ar­mið um vel­ferð dýra.

Hvalur hf. er síð­asta starf­andi hval­veiði­fyr­ir­tæki lands­ins. Um 150 manns starfa hjá fyr­ir­tæk­inu yfir veiði­tím­ann, sem stendur að jafn­aði frá byrjun júní og fram í byrjun sept­em­ber. Utan veiði­tíma­bils­ins starfa þar á bil­inu 40 til 50 manns.