Kieran Hayler mætti í Lewes Crown Court í dag þar sem hann er ákærður fyrir að hafa nauðgað 13 ára stúlku og beitt hana kynferðislegu ofbeldi á meðan hann var giftur Katie Price, enskri fjölmiðlastjörnu, fyrirsætu og athafnakonu.
Meint brot eiga að hafa átt sér stað á tímabilinu frá júní til október 2016 á heimili í West Sussex. Lögreglan segir að stúlkan, sem ekki má nafngreina af lagalegum ástæðum, hafi fengið stuðning frá sérþjálfuðum lögreglumönnum.
Hayler, 39 ára, sem var áður eiginmaður Price, neitar öllum ákærum.
Við réttarhöld í maí kom fram að Price, sem er 48 ára, verði kölluð til vitnisburðar í málinu.
Dómstólnum var sagt að Price, sem var gift Hayler þegar meint brot áttu sér stað, muni gefa skýrslu í réttarhöldunum, sem gert er ráð fyrir að standi í tvær vikur. Stúlkan er ekki úr stórfjölskyldu Haylers eða Price.
Price og Hayler gengu í hjónaband á Bahamaeyjum árið 2013 en skildu síðar.
Eftir yfirheyrslu í október var Hayler látinn laus gegn tryggingu þar til réttarhöldin hófust í dag.
Talsmaður Haylers sagði áður:
„Kieran Hayler neitar þessum ásökunum alfarið og harðlega.
Herra Hayler hefur tekið fullan þátt í rannsókninni og unnið með lögreglu allt frá upphafi hennar og mun halda því áfram. Hann hlakkar til þess að fá nafn sitt hreinsað og treystir réttarkerfinu til þess.“
Athugasemdir