Reykjavíkurborg hyggst móta samræmt verklag til að aðstoða einstaklinga sem vilja komast út úr vændi eða mansali. Tillaga þess efnis var samþykkt á fundi velferðarráðs Reykjavíkurborgar í vikunni.
Tillagan kom frá fulltrúum Sjálfstæðisflokksins, Viðreisnar og Framsóknarflokksins og gerir ráð fyrir að sérstakur verkefnahópur verði settur á laggirnar. Í honum eiga að sitja fulltrúar velferðarsviðs Reykjavíkurborgar, Bjarkarhlíðar, Stígamóta og Félagsbústaða. Þá verður óskað eftir aðkomu lögreglunnar á höfuðborgarsvæðinu og annarra hagaðila eftir þörfum.
Hópnum verður falið að móta skýra þjónustuleið fyrir fólk sem vill komast út úr vændi eða mansali. Ábyrgð og hlutverk hvers aðila eiga að vera skilgreind og tryggja á samfellu í þjónustunni.
Sérstök áhersla verður lögð á að fólk fái skjótt aðgengi að öruggu húsnæði, félagslegum stuðningi, áfallamiðaðri ráðgjöf og öðrum nauðsynlegum úrræðum án þess að þurfa sjálft að leita á milli stofnana.
Segja 90 prósent vilja hætta
Í bókun fulltrúa Sjálfstæðisflokksins, Samfylkingarinnar, Viðreisnar, Vinstrisins og Framsóknarflokksins kemur fram að í nýlegri heimsókn til Stígamóta hafi verið vakin athygli á kerfislægum hindrunum sem mæti fólki sem vill komast út úr vændi eða mansali.
Þar hafi komið fram að um 90 prósent einstaklinga í vændi vilji hætta en fátækt, húsnæðisleysi og áföll geti gert þeim erfitt fyrir að sjá leið út úr aðstæðunum. Þá geti skömm gert fyrsta skrefið í átt að aðstoð sérstaklega erfitt.
Fulltrúarnir telja að þjónustukerfið megi ekki verða önnur hindrun þegar fólk leitar sér hjálpar. Markmiðið sé því að fólk þurfi ekki að ganga á milli stofnana og segja sögu sína ítrekað til að fá viðeigandi aðstoð.
Miðflokkurinn vildi breyta tillögunni
Helgi Áss Grétarsson, fulltrúi Miðflokksins í ráðinu, lagði fram breytingartillögu. Þar lagði hann meðal annars til að í verkefnahópnum sætu einnig akademískur sérfræðingur við Háskóla Íslands sem styður afglæpavæðingu vændis og fulltrúi Rauðu regnhlífarinnar, samtaka kynlífsverkafólks á Íslandi.
Í breytingartillögunni var jafnframt gert ráð fyrir að þjónustuleiðin beindist að einstaklingum sem stunda vændi í skjóli mansals og vilja komast út úr þeirri aðstöðu.
Breytingartillagan var felld með sex atkvæðum gegn einu.
Helgi Áss sat hjá þegar upphaflega tillagan var samþykkt. Í bókun sinni sagði hann framkvæmd stefnu stjórnvalda í vændismálum fyrst og fremst vera á ábyrgð ríkisins en ekki sveitarfélaga. Hann sagði tillöguna því hafa viss einkenni pólitískrar sýndarmennsku.
Hann tók þó fram að félagsþjónusta sveitarfélagsins ætti meðal annars að ná til íbúa sem væru fórnarlömb mansals. Það leiddi hins vegar ekki sjálfkrafa til þess að sveitarfélagið ætti að aðstoða íbúa sem vildu hætta að veita kynlífsþjónustu og taldi hann slíkt verkefni fremur eiga heima hjá ríkisvaldinu.
Verkefnahópurinn á að skila velferðarráði tillögu að verklagi og útfærslu fyrir 20. desember.
Athugasemdir