Íslenska hljómsveitin Fjöll sendir í dag frá sér lagið „Waves“, annað lagið af væntanlegri plötu sveitarinnar sem stefnt er að að komi út snemma á næsta ári.
Lagið er rólegt og vandað indírokk í anda sveitarinnar og fjallar um tengsl fólks í gegnum súrt og sætt, samkvæmt tilkynningu frá bandinu. „Við stígum ölduna í gegnum súrt og sætt og þótt við villumst af leið eru alltaf einhverjir sem hjálpa okkur að finna rétta braut,“ eins og það er orðað í tilkynningunni.
Upptökur á nýju plötunni hófust í Valencia á Spáni fyrir rúmu ári og hefur sveitin unnið jafnt og þétt að þeim síðan. Fyrra lagið af plötunni kom áður út.
Fjöll skipa Guðmundur Annas Árnason, söngvari og hljómborðs- og munnhörpuleikari, Snorri Gunnarsson, gítarleikari og söngvari, Guðmundur Freyr Jónasson, gítarleikari, Kristinn Jón Arnarson, bassaleikari, og félags- og húsnæðismálaráðherrann Ragnar Þór Ingólfsson, trommari.
Þótt Fjöll hafi starfað í nokkur ár ná tengsl hluta meðlima sveitarinnar mun lengra aftur. Guðmundur Annas, Snorri og Kristinn hafa starfað saman í þrjá áratugi, allt frá því þeir spiluðu í hljómsveitinni Soma, sem naut töluverðra vinsælda undir lok tíunda áratugarins.
Ragnar lék á sínum tíma með hljómsveitunum Guði gleymdir og Los, en Guðmundur Freyr var meðal annars í Vígspá, sem var áberandi í íslensku harðkjarnasenunni í kringum aldamótin.
Með útgáfu „Waves“ heldur Fjöll áfram að kynna nýja plötu sem væntanleg er snemma á næsta ári.
Hlusta má á „Waves“ á Spotify: Fjöll – Waves
Athugasemdir