Hörður Arnarson, forstjóri Landsvirkjunar, gagnrýnir fyrirkomulag samkeppniseftirlits hér á landi og telur tilefni til að endurskoða hvernig aðskilnaði rannsóknar, mats á ætluðum brotum og ákvörðunar um viðurlög er háttað. Þetta kemur fram í aðsendri grein hans í Morgunblaðinu.
Tilefnið er rannsókn Samkeppniseftirlitsins á þátttöku Landsvirkjunar í útboðum Landsnets á raforku vegna flutningstapa á árunum 2017 til 2021. Samkeppniseftirlitið sektaði Landsvirkjun um 1,4 milljarða króna en áfrýjunarnefnd samkeppnismála felldi ákvörðunina úr gildi.
Hörður segir Landsvirkjun hafa talið ljóst við rannsókn málsins að Samkeppniseftirlitið hefði farið út fyrir valdheimildir sínar. Eftirlitið hafi jafnframt tortryggt aðgerðir fyrirtækisins til að tryggja orkuöryggi og vinna samkeppnisréttaráhættugreiningu.
„Reynslan af þessu máli gefur hins vegar tilefni til að velta fyrir sér hvort núverandi fyrirkomulag samkeppniseftirlits tryggi nægilegan aðskilnað rannsóknar, mats á ætluðu broti og endanlegrar ákvörðunar um brot og viðurlög,“ skrifar Hörður.
Hann lýsir hlutverki Samkeppniseftirlitsins með orðunum „rannsakar, ákærir og dæmir“ og telur það vekja spurningar um hvort nægilega skýr skil séu á milli hlutverkanna.
Hörður segir Landsvirkjun hafa tekið þátt í útboðum Landsnets til að tryggja raforkuöryggi. Ef Landsnet fengi ekki næga raforku til að mæta flutningstöpum gæti raforkukerfið hrunið.
Hann segir annmarka rannsóknarinnar ekki aðeins hafa snúið að formsatriðum. Markaðir hafi ekki verið skilgreindir með fullnægjandi hætti og rannsókn á skilyrðum og mögulegum skaðlegum áhrifum hafi jafnframt verið ófullnægjandi.
Athugasemdir