Eldsvoði geisaði á hóteli í indversku borginni Kolkata og drap að minnsta kosti 15 manns, að sögn lögreglu, en sumir reyndu að komast undan með því að klifra út um glugga og upp á þak.

Fjölda fólks var bjargað úr herbergjum og af þaki hótelsins, sagði Manoj Verma, lögreglustjórinn í Kolkata, við AFP eftir að eldurinn kviknaði að kvöldi þriðjudags.

„Hótelið breyttist í gas­klefa og það virðist sem margir hafi kafnað til dauða,“ sagði Verma og bætti við að rannsókn væri hafin til að komast að orsök eldsins.

Rituraj-hótelið, sem hýsti 88 gesti þegar eldurinn kviknaði, er staðsett í viðskipta­hverfi í miðborg Kolkata.

Um tugur manna slasaðist og fór í kjölfarið á sjúkrahús.

Starfsmaður hótelsins sagði AFP að eldurinn hefði kviknað á fyrstu hæð sex hæða byggingarinnar. Eldar í byggingum eru algengir á Indlandi vegna skorts á slökkvibúnaði og vanrækslu öryggisreglna.

Sjónarvotturinn Nanda Mondal, sem rekur byggingarfyrirtæki, sagði að hann hefði séð plastplötur sem huldu bygginguna vegna framkvæmda og virtust hafa „ýtt undir eldinn“.

„Maður lést eftir að hafa reynt að klifra niður niðurfallsrör,“ sagði Mondal.