Tilkynningum um kynferðislega áreitni og stafræn kynferðisbrot hefur fjölgað verulega milli ára, samkvæmt tölfræði lögreglu. Um 350 brot voru tilkynnt á fyrri helmingi ársins og voru börn tæplega helmingur brotaþola. Tilkynningar hafa ekki verið fleiri síðan árið 2021.
Kristján Ingi Kristjánsson, fulltrúi í kynferðisbrotadeild lögreglunnar, segir þróunina meðal annars fylgja aukinni snjallsímanotkun og breyttum samskiptaleiðum. Brotamenn nýti samfélagsmiðla og leikjasíður til að komast í samband við börn og þykist jafnvel vera jafnaldrar þeirra.
„Það er búið að hleypa níðingum inn í herbergi til barnanna okkar,“ segir Kristján í samtali við Morgunútvarp Rásar 2.
Hann segir lögreglu fá alvarleg mál af þessu tagi inn á borð í hverri viku.
„Jafnvel er verið að kúga börn til að gera eitthvað við annað fólk. Þannig mál koma inn á borð lögreglu í hverri viku, þar sem til dæmis er búið að kúga börn til að senda nektarmyndir.“
Í kjölfarið geti börnunum verið hótað að myndunum verði dreift til foreldra, vina og ættingja nema þau sendi enn grófara efni eða greiði peninga. Dæmi séu um að unglingar hafi notað öll sumarlaun sín til að reyna að koma í veg fyrir dreifingu.
Kristján telur lögreglu aðeins sjá toppinn á ísjakanum. Brotunum fylgi mikil skömm og mörg þeirra séu illrekjanleg þar sem brotamenn geti verið erlendis.
Hann leggur áherslu á að forvarnir hefjist á heimilunum og segir hættulegt að afhenda mjög ungum börnum snjallsíma og sambærileg tæki án nægilegrar fræðslu um hætturnar.
