Antonio Guterres, aðalritari Sameinuðu þjóðanna, sagði á þriðjudag að Gaza hafi breyst í „drápsvöll“, og sakaði Ísrael um að hindra aðstoð og vanrækja „óumdeilanlegar skyldur sínar“ til að mæta þörfum íbúa svæðisins.

„Meira en mánuður er liðinn án þess að dropi af aðstoð hafi borist til Gaza. Enginn matur. Ekkert eldsneyti. Engin lyf. Engar birgðir. Þegar hjálpin þornaði upp, opnuðust flóðgáttir hryllingsins á ný,“ sagði Guterres við blaðamenn.

Hann vísaði í Genfarsáttmálann, sem kveður á um meðferð fólks í stríði, og lagði áherslu á skyldur „hernámsvalds“ til að tryggja mat og lyf handa almenningi.

„Ekkert af þessu á sér stað í dag. Engin mannúðaraðstoð kemst inn í Gaza,“ sagði hann.

Guterres gagnrýndi nýlega fyrirhuguð „leyfisferli“ Ísraela fyrir afhendingu hjálpar sem að hans mati gætu leitt til „grimmilegrar stýringar“ á aðstoð, jafnvel „niður í síðustu kaloríu og hveitikorn“.

Hann vísaði þar til tillagna Ísraels um eftirlit með matarsendingum til að koma í veg fyrir að Hamas misnoti þær, samkvæmt heimildum AFP innan SÞ.

„Við munum ekki taka þátt í neinu fyrirkomulagi sem brýtur gegn grundvallarreglum mannúðar – mannúð, hlutleysi, sjálfstæði og óhlutdrægni,“ sagði Guterres og krafðist þess að aðstoð fái óhindraðan aðgang til Gaza.

Hann lýsti einnig áhyggjum af stöðunni á Vesturbakkanum:

„Núverandi stefna er dauðagildra – algjörlega óásættanleg samkvæmt alþjóðalögum og sögunni,“ sagði hann. „Og hættan á að hinn hernumdi Vesturbakki verði næsta Gaza gerir stöðuna enn verri.“

„Tími er kominn til að binda enda á ómannúð, vernda óbreytta borgara, leysa gísla úr haldi, tryggja lífsnauðsynlega aðstoð og endurnýja vopnahlé.“