Eins og greint hefur verið frá fjölmiðlum um allan heim gerðu Bandaríkin árás á Venesúela í morgun og hefur Nicolás Maduro, forseti landsins, verið handtekinn og færður úr landi. Hann verður ákærður í New York-fylki fíkniefnahryðjuverk og kókaíninnflutning.
Kristinn Hrafnsson, ritstjóri Wikileaks, greindi stöðuna fyrr í dag og sagði þetta mál hafa áhrif á Ísland.
„Mesta herveldi heims hefur nú formlega notað sprengjur sínar til þess að slátra alþjóðalögum endanlega og allri reglu í heiminum,“ skrifaði Kristinn á Facebook. „Aflið mun hér eftir ráða hindrunarlaust. Skoða má atburði dagsins sem fyrirboða um framtíð Grænlands þar sem aðstaða Bandaríkjahers á Íslandi verður að líkindum notuð í aðgerðum ef Grænland verður ekki afhent möglunarlaust. Það hefur verið gefið skýrt merki til annara valdamikilla ríkja um hvað telst norm. Nú um stundir eru Kínverjar að hringsóla í kringum Taiwan í stærstu heræfingu til þessa. Í Peking verður litið til Venesúela sem grænt ljós á aðgerðir og endurtöku á eyjunni. Skilaboðin til Kreml eru einnig skýr og að hin ólögmæta innrás Pútíns í Úkraínu telst nú eðlileg og réttmæt. Árið 2026 verður minnst sem ársins þar sem allt breyttist þó að aðdragandinn hafi verið ljós og ferlið langt – að minnsta kosti aldarfjórðungur. Smáríki hafa nú litlar bjargir.“
Biður íslenska blaðamenn að gæta sín
Í athugasemdakerfinu bætti Kristinn svo við; „Íslenskir blaðamenn verða að gæta sig á því að gleypa ekki hráa áróðursvitleysuna frá núverandi Bandaríkjastjórn. Cartel de los Soles er ekki eiturlyfjahringur eða samtök yfirhöfuð heldur hugtak notað af blaðamönnum og almenningi í Venesúela um spillta aðila innan hersins. Það er eins og að skilgreina Kolkrabbann sem hryðjuverkasamtök að setja þann stimpil á Cartel de los Soles. Jafn fráleitt að skilgreina Madúro leiðtoga þessa tilbúnings.“
