Héraðsdómur Reykjavíkur hefur dæmt Ævar Annel Valgarðsson í tveggja mánaða skilorðsbundið fangelsi fyrir fjársvik, þjófnað og tvö brot á vopnalögum.

Ævar játaði fyrir dómi að hafa í ágúst 2023 notað bensínkort annars manns í heimildarleysi til að greiða fyrir vörur á þremur bensínstöðvum N1 að samtals rúmlega 95 þúsund króna verðmæti.

Hann játaði einnig að hafa brotist inn í geymslu í Reykjavík og stolið þaðan Winchester-haglabyssu að verðmæti um 40 þúsund króna, auk þess sem hann viðurkenndi að hafa verið með steikarhníf á sér þegar lögregla framkvæmdi öryggisleit á honum í apríl 2025.

Málið dróst nokkuð á langinn en við aðalmeðferð játaði Ævar loks sök í öllum ákæruliðum og samþykkti jafnframt að hnífurinn yrði gerður upptækur.

Við ákvörðun refsingar leit dómurinn meðal annars til þess að ákærði hefði játað brotin, að töluverður tími væri liðinn frá því þau voru framin og að tafir á málsmeðferð yrðu honum ekki kenndar. Þá kom fram að hann hefði farið í meðferð vegna vímuefnafíknar og hefði fullan hug á að snúa lífi sínu til betri vegar. Að mati dómsins tengdust brotin fíknivanda hans.

Refsingin var ákveðin tveggja mánaða fangelsi en fullnustu hennar var frestað til tveggja ára gegn því skilyrði að hann haldi almennt skilorð. Auk þess var honum gert að greiða rúmlega 820 þúsund krónur í sakarkostnað og málsvarnarlaun.