Lögreglan hefur birt öllum áhafnarmeðlimum skipsins Bandero ákvörðun um brottvísun úr landi og endurkomubann.

Fram kemur í tilkynningu lögreglu að fyrir ríkisborgara utan Evrópska efnahagssvæðisins (EES) taki endurkomubannið til alls Schengen-svæðisins. Fyrir ríkisborgara EES-ríkja gildi bannið hins vegar aðeins gagnvart Íslandi.

Endurkomubannið gildir í að lágmarki tvö ár og tekur gildi þegar viðkomandi yfirgefur landið.

Áhafnarmeðlimum hefur verið heimilað að yfirgefa skipið á meðan beðið er framkvæmdar brottvísunarinnar. Þeim ber þó að mæta reglulega hjá lögreglu samkvæmt tilkynningarskyldu þar til þeir fara úr landi.

Heimferða- og fylgdardeild ríkislögreglustjóra mun annast framkvæmd brottvísunar áhafnarinnar.

Landhelgisgæslan, í samstarfi við sérsveit ríkislögreglustjóra, stöðvaði för skips Paul Watsons, Bandero, sem á dögunum mætti í lögsögu Íslands til þess að trufla hvalveiðar Kristjáns Loftssonar.