Alþjóðaknattspyrnusambandið FIFA hefur ákveðið að banna áhorfendum og sjálfboðaliðum að taka með sér vatnsflöskur inn á leikvanga á heimsmeistaramótinu í knattspyrnu sem hefst í Bandaríkjunum, Kanada og Mexíkó í næstu viku.

Ákvörðunin kemur á síðustu stundu, aðeins viku áður en mótið hefst, þrátt fyrir að áður hafi verið heimilt að taka með sér tóma, gegnsæja plastbrúsa samkvæmt reglum FIFA um aðgengi að leikvöngum.

FIFA segir bannið sett á til að tryggja öryggi leikmanna og gesta. Í yfirlýsingu sambandsins segir að markmiðið sé að koma í veg fyrir meiðsli og hættur sem geti skapast ef flöskur eða önnur ílát eru notuð með óviðeigandi hætti. Sömu reglur muni gilda um dósir og bolla.

Margir leikjanna fara fram við mikinn hita og hefur ákvörðunin vakið gagnrýni meðal stuðningsmanna. Enski stuðningsmannahópurinn Free Lions segir breytinguna koma á óvart og bendir á að FIFA hafi áður fullvissað stuðningsmenn um að þeir mættu koma með eigin vatnsbrúsa og að aðgangur að ókeypis drykkjarvatni yrði tryggður.

Verð á vatni innan leikvanga verði samkvæmt verðskrá hvers leikvangs fyrir sig.