Ísland Duty Free hefur ráðið Önnu Hildi W Björnsdóttur í starf framkvæmdastjóra mannauðs og menningar hjá fyrirtækinu.

Í tilkynningu frá fyrirtækinu kemur fram að Anna Hildur búi yfir víðtækri reynslu af mannauðs- og menningarmálum í alþjóðlegu rekstrarumhverfi. Hún hafi síðustu ár starfað á alþjóðamarkaði og síðast hjá Carbon Recycling International (CRI), þar sem hún sinnti mannauðs- og menningarmálum á Íslandi, í Danmörku, Póllandi og Kína.

Áður starfaði hún meðal annars sem mannauðsstjóri hjá Travelshift ehf. og Iceland Hotel Collection by Berjaya, auk þess að vera People & Culture Business Partner hjá IKEA.

Anna Hildur er með meistaragráðu í mannauðsstjórnun og meistaragráðu í sálfræði frá Háskóli Íslands.

Í tilkynningunni er haft eftir Liam Grundy að mikil ánægja ríki með ráðninguna.

„Við erum svo sannarlega heppin og mjög ánægð með að fá Önnu Hildi til liðs við okkur. Hún hefur sterkan bakgrunn, frábæra alþjóðlega reynslu og áralangan feril að baki við uppbyggingu og stefnumótun mannauðsmála þvert á landamæri,“ segir Liam meðal annars.

Hann segir jafnframt að gildi og sýn Önnu Hildar falli vel að stefnu fyrirtækisins.

„Hún endurspeglar vel þá menningu sem við viljum byggja upp, sem grundvallast á trausti og fjölskylduvænu samfélagi. Hún kemur með ferskt sjónarhorn inn í heim ferðaverslunar og við erum mjög spennt að hefja þá vegferð saman,“ segir hann.

Anna Hildur segir sjálf spennandi að ganga til liðs við fyrirtækið á þessum tímamótum.

„Það er virkilega spennandi að ganga til liðs við öflugt teymi Ísland Duty Free og taka þátt í áframhaldandi þróun fyrirtækisins á þessum tímamótum,“ segir hún.

Hún segir jafnframt að hún hafi á ferli sínum lagt ríka áherslu á að styðja starfsfólk og teymi í gegnum breytingar og að gagnkvæmt traust sé lykill að árangri.

„Nú þegar uppbyggingin á verslun Ísland Duty Free í Leifsstöð er á lokametrunum hlakka ég mikið til að vinna með teyminu að áframhaldandi uppbyggingu á framtíðarstefnu, starfsumhverfi og menningu fyrirtækisins,“ segir Anna Hildur.