Ásthildur Lóa Þórsdóttir, þingmaður Flokks fólksins og fyrrverandi mennta- og barnamálaráðherra, vill verða aftur ráðherra en hún greinir frá þessu í viðtali á Sprengisandi á Bylgjunni í morgun.

Ásthildur Lóa sagði af sér embætti sem mennta- og barnamálaráðherra í mars á þessu eftir að upp komst að hún hefði eignast barn með 16 ára dreng þegar hún var sjálf 23 ára. Þá lýsti faðirinn því yfir að ráðherrann hefði tálmað umgengni hans við barn þeirra en Ásthildur hefur neitað slíku.

Það var fyrrum tengdamóðir Ásthildar sem lét kom þessu öllu á en henni fannst ekki rétt að Ásthildur væri mennta- og barnamálráðherra með þessa fortíð og hafði samband við forsætisráðuneytið til að láta vita af málum hennar. Ásthildur fór í kjölfarið að heimili tilkynnandans og reyndi að hringja í hana eftir að hún fékk upplýsingar frá aðstoðarmanni forsætisráðherra um nafn hennar.

Eftir að hafa sagt af sér fór Ásthildur í leyfi frá Alþingi en snéri aftur í síðustu viku. „Þetta er rosa­legt áfall. Ég eig­in­lega bara skreið í skjól, ég skreið í hýði. Ég talaði ekki við neinn. Ég fór ekki út, ég fór ekki út í búð eða neitt, vegna þess að and­litið á mér var út um allt. Þó að umræðan hafi snú­ist mér í vil al­veg svaka­lega hratt þá var þetta bara ofboðslega óþægi­leg til­finn­ing,“ sagði Ásthild­ur Lóa um upplifun sína á málinu.

„Ég ætla ekki að fara í graf­göt­ur með það, mig lang­ar gríðarlega mikið að fara aft­ur í þetta embætti,“ sagði Ásthild­ur Lóa og vísaði þar í embætti mennta- og barnamálaráðherra. Hún tók þó fram að Guðmundur Ingi Kristinsson, núverandi ráðherra, hefði fullan stuðning hennar

„Það er kom­in þarna ráðherra og hann á all­an minn stuðning. Það verður bara að koma í ljós hvað ger­ist í framtíðinni. Hvað mig lang­ar og hver er raun­veru­leik­inn það er kannski ekki endi­lega sami hlut­ur­inn. Maður verður bara að standa með þess­ari ákvörðun. Ég verð bara að gera það. Ég á ekki kröfu á það að starf­andi ráðherra segi af sér eða eitt­hvað þess hátt­ar. Ég á það ekki og kem ekki til með að gera hana.“