Mikil umræða hefur undanfarna daga skapast í Facebook-hópnum Fávitar í umferðinni en nú í sumar hafa reglulega birst myndbönd af vafasömum akstri ökumanna á Íslandi.

Í myndböndum sem birtust nýlega á síðunni má sjá ökumann Audi-bifreiðar stofna fjölda fólks í lífshættu með vafasömu aksturslagi sínu þann 13. júní. Bílstjórinn tekur í myndbandinu ítrekað fram úr öðrum bílum á verstu mögulegu tímum og ólöglega. Litlu má muna að illa fari í nokkur skipti.

Fólk á síðunni er vægast sagt ósátt við aksturinn ef marka má athugasemdirnar um hann.

„Svo mörgum sem liggur lífið á, þar til þau hafa ekki lengur líf,“ skrifar Kolbrún Jóhannesdóttir um málið.

„Merkilegt að fólki liggur það mikið á, að þeim finnst í lagi að stofna lífi þeirra og annarra í hættu,“ sagði svo í annarri athugasemd.

„Ekki undarlegt þó slys verði nær daglega á þjóðveginum, því líkir djöflar sem eru í umferðinni,“ skrifar Sigurður Haraldsson um ökumanninn.