Íris Andradóttir, blaðamaður hjá norska sakamálaþættinum Åsted Norge, leitar nú upplýsinga á Íslandi um ungan mann sem hvarf fyrir nærri 60 árum og fannst síðar látinn í Noregi við dularfullar aðstæður.
Í færslu sem hún birti í Facebook-hópnum Gamlar ljósmyndir segir Íris að hún vinni nú að rannsókn á máli hins 17 ára Tommy Plath.
Tommy fannst látinn í þorpinu Borre í Vestfold í júlí 1966. Í fórum hans fannst veski með 1100 sænskum krónum en engin skilríki, aðeins reikningur frá Loftleiðahótelinu með nafninu Anders Karlsson, frá Jönköping í Svíþjóð. Fingraför sýn að um hinn 18 ára gamla Tommy Plath frá Sävsjö í Svíþjóð.
„Tommy hvarf frá heimili sínu í Svíþjóð 11. eða 12. júlí árið 1966 og fannst látinn í Noregi um það bil mánuði síðar. Enn þann dag í dag hefur ekki tekist að komast að dánarorsök hans,“ skrifar Íris í færslunni.
Rannsóknin hefur nú leitt þáttagerðarfólkið til Íslands vegna þess kvittunarinnar frá Hótel Loftleiðum sem fannst í vasa piltsins þegar lík hans fannst.
„Ástæða þess að rannsóknin hefur leitt okkur til Íslands er sú að þegar Tommy fannst látinn var líka fundin kvittun frá Hótel Loftleiðum í vasa hans. Hann hefur þá sennilega dvalið á hótelinu dagana 13.-15. júlí 1966 undir fölsku nafni, Anders Karlsson,“ segir í færslunni.
Íris biðlar nú til almennings um aðstoð við að varpa ljósi á dvöl mannsins hér á landi og hvort einhver muni eftir honum eða hafi upplýsingar sem gætu nýst rannsókninni.
„Við reynum nú að komast að því hvað hann var að gera á Íslandi og hvort einhver hafi séð hann eða hitt á þeim tíma. Allar upplýsingar geta skipt máli.“
Hún segir jafnframt að jafnvel smávægilegar upplýsingar geti reynst gagnlegar.
„Ef þú aðeins kannast við nafnið (hvort sem það er Tommy Plath eða Anders Karlsson) væri það líka áhugaverðar upplýsingar.“
Talið er að hann hafi ferðast með Loftleiðum frá Torslanda í Svíþjóð til Reykjavíkur þann 13. júlí og með Loftleiðum frá Reykjavík til Óslóar þann 16. júlí.
Ef einhver er með upplýsingar um málið er hægt að senda Írisi tölvupóst á [email protected].
Komment