Landsbjörg greinir frá annasömum degi en miðvikudagurinn 6. ágúst reyndist björgunarsveitum landsins atburðaríkur.

Upp úr klukkan 10 um morgun voru björgunarsveitir á Vestfjörðum kallaðar út í hæsta forgangi af vaktstöð siglinga. Smábátur leigður ferðamönnum til sjóstangveiða hafði dottið úr vöktun. Áhöfnin á björgunarskipinu Kobba Láka frá Bolungarvík ásamt björgunarsveitinni á Suðureyri voru kallaðar út auk þyrluáhafnar. Björgunarsveitirnar náðu að staðfesta að allt væri í lagi um borð smábátsins og björgum var snúið við.

Björgunarfólk var kallað út í hádeginu á Fimmvörðuhálsi vegna veikinda og lauk ekki aðgerðinni fyrr en rétt fyrir klukkan 18. Hins vegar fékk björgunarfólkið ekki mikla hvíld því stuttu eftir að þau komu að bækistöðinni barst önnur aðstoðarbeiðni af Fimmvörðuhálsi.

Skammt frá Baldvinsskála voru tveir göngumenn en annar þeirra hafði meiðst á fæti og gat ómögulega gengið áfram. Rétt fyrir klukkan 22 kom fyrsta björgunarfólkið að göngumönnunum sem höfðu slegið upp tjaldi á meðan þeir biðu hjálpar. Ferðamennirnir voru fluttir í bíl af hálsinum að gistiskála og björgunarfólk skildi við þá rétt fyrir miðnætti þegar ferðamennirnir töldu sig ekki þurfa frekari aðstoð.

Á meðan aðgerðir stóðu yfir á Fimmvörðuhálsi barst aðstoðarbeiðni frá ferðamönnum rétt fyrir klukkan 14 sem höfðu fest bíl sinn í Jökulsá í Lóni. Björgunarfélag Hornafjarðar fór á staðin á tveimur öflugum bílum. Vegna fyrstu boða bjóst björgunarfólkið ekki við mikilli hættu en þegar þau komu á staðin voru þrír ferðamenn fastir á þaki bílsins sem var vel á kafi í ánni. Björgunarfélagið náði að ferja fólkið í land og með öflugum björgunarbíl náðist bíll ferðamannanna upp úr. Fólkið fékk að þurrka búnaðinn sinn í húsnæði Björgunarfélags Hornafjarðar.

Skömmu eftir útkallið í Lóni var björgunarsveitin Strákar á Siglufirði kölluð út. Þar hafði annað ökutæki fest sig, í þetta sinn í Leyningsá, skammt innan Siglufjarðar. Í lýsingu Landsbjargar gekk fljótt og vel að leysa það verkefni.