Drangar hafa gengið frá kaupum á öllu hlutafé í Brauð & Co., einu þekktasta handverksbakaríi landsins. Þetta kemur fram í tilkynningu frá félaginu. Kaupverðið verður greitt með blöndu af hlutabréfum í Dröngum og reiðufé.
Brauð & Co. rekur átta útsölustaði á höfuðborgarsvæðinu og nam ársvelta félagsins rúmlega 1,5 milljörðum króna. Félagið skilaði hagnaði á rekstrarárinu 2025 og hefur á undanförnum árum byggt upp sterka markaðsstöðu með áherslu á handverk, gæði og upplifun viðskiptavina.
Í tilkynningunni segir að Drangar sjái veruleg vaxtartækifæri í rekstri Brauðs & Co. Stefnt sé að því að fjölga útsölustöðum á næstu misserum, meðal annars við Nettó-verslanir sem eru í eigu félagsins.
Auður Daníelsdóttir, forstjóri Dranga, segir að félagið þekki rekstur Brauðs & Co. vel og hafi kynnst sterku stjórnenda- og starfsmannateymi þess. Hún segir markmiðið að styðja við áframhaldandi uppbyggingu fyrirtækisins og byggja á þeim trausta grunni sem þegar hafi verið lagður.
Drangar eiga meðal annars verslanakeðjurnar Nettó, SPAR, Prís, Krambúðina, Kjörbúðina og 10–11. Með kaupunum telja stjórnendur félagsins að staða þess á matvörumarkaði styrkist enn frekar og að ný tækifæri skapist til vaxtar og bættrar þjónustu.
