Brynjar Níelsson, borgarfulltrúi Sjálfstæðisflokksins, segir umræðuna um mögulegar aðildarviðræður Íslands við Evrópusambandið draga athyglina frá því sem hann kallar slakan árangur ríkisstjórnarinnar í efnahagsmálum.
Í Facebook-færslu segir Brynjar að verðbólga hafi verið komin niður í fimm prósent þegar núverandi ríkisstjórn tók við völdum í lok árs 2024, eftir að hafa farið yfir tíu prósent í kjölfar heimsfaraldursins.
„Ég minnist þess að í febrúar 2023 hafi verðbólgan verið rúm 10 prósent eftir covid árin en hafi lækkað jafnt og þétt í 5 prósent þegar þessi ríkisstjórn tók við í lok árs 2024. Það telst þokkalegur árangur hjá fyrri ríkisstjórn sem þurfti á sama tíma að glíma við hörmungarnar í Grindavík.“
Brynjar gagnrýnir ríkisstjórn dagsins í dag fyrir að hafa ekki náð frekari árangri í baráttunni við verðbólgu og háa vexti.
„Þrátt fyrir stór orð, ekki síst um eigið ágæti, er árangur þessarar ríkisstjórnar minni en enginn og kjörtímabilið næstum hálfnað. Verðbólga er komin í 5,3 prósent og vaxtahækkanir halda áfram. Í stað þess að fara í nauðsynlegar aðgerðir á að eyða restinni af kjörtímabilinu í að plata þjóðina inn í ESB, sem vill svo til að stendur á efnahagslegum brauðfótum. Þetta hlýtur að vera eitthvert met í úrræðaleysi.“
Að lokum segir Brynjar að Ísland eigi fremur að leggja áherslu á samstarf við Bandaríkin og Norðurlöndin en að sækja um aðild að Evrópusambandinu.
„Nær væri að styrkja samband okkar við USA, sem hefur reynst okkur best í gegnum tíðina ásamt norrænu frændum okkar. Tala nú ekki um ef menn telja varnar- og öryggismál mikilvæg í breyttum heimi.“
