Nói Síríus skilaði sterkri afkomu á árinu 2025 samkvæmt nýbirtum ársreikningi félagsins. Hagnaður ársins nam 421 milljón króna, samanborið við 246 milljóna króna hagnað árið 2024. Afkoman batnaði því umtalsvert á milli ára.
Viðskiptablaðið greindi frá.
Stjórn félagsins hefur lagt til að greiddur verði 250 milljóna króna arður til hluthafa á árinu 2026 í ljósi rekstrarárangursins og sterkrar fjárhagsstöðu fyrirtækisins.
Efnahagur félagsins styrktist jafnframt á árinu. Heildareignir voru bókfærðar á um 5,3 milljarða króna í árslok 2025, samanborið við 4,7 milljarða króna í lok árs 2024. Eigið fé nam 3 milljörðum króna í árslok.
Eigendahald félagsins tók breytingum á árinu 2026. Í lok árs 2025 var norska félagið Orkla Snacks eini eigandi Nóa Síríus. Í mars á þessu ári var hins vegar gengið frá samkomulagi um sölu á öllu hlutafé félagsins til Alfa Framtak.
