Matvælastofnun varar neytendur við pottjárnsgrillpönnum af gerðinni Napoleon sem Byko hefur flutt inn vegna hættu á flæði þungmálma úr vörunni.

Byko hefur innkallað pönnurnar í samráði við Heilbrigðiseftirlit Garðabæjar, Hafnarfjarðar, Kópavogs, Mosfellsbæjar og Seltjarnarness.

Viðvörunin barst til Íslands í gegnum evrópska hraðviðvörunarkerfið RASFF, sem er ætlað að miðla upplýsingum um hættuleg matvæli, fóður og efni sem komast í snertingu við matvæli.

Innköllunin nær til eftirfarandi vöru:

• Vörumerki: Napoleon
• Vöruheiti: Grillpanna úr pottjárni
• Framleiðandi: Napoleon Systems and Developments Ltd, Kanada
• Framleiðsluland: Kína
• Innflytjandi: Byko
• Dreifing: Allar verslanir Byko og vefverslunin byko.is

Í tilkynningu frá Byko eru kaupendur hvattir til að hætta notkun pönnunnar tafarlaust og skila henni í næstu verslun Byko.