Dómarafélag Íslands gagnrýnir harðlega áform stjórnvalda um að hækka laun dómara og annarra embættismanna um 3,5 prósent á árinu en dómarar vilja fá meira en 3,5 prósent.

RÚV greindi frá þessu.

Í umsögn félagsins kemur fram að þetta sé í fimmta sinn á sjö árum sem stjórnvöld grípi inn í kjör dómara með því að takmarka hækkanir, fresta þeim eða reyna að endurheimta meintar ofgreiðslur vegna útreikningsmistaka.

Félagið vísar einnig til álits Feneyjanefndar Evrópuráðsins, þar sem fram kemur að tímabundnar almennar launalækkanir geti verið réttlætanlegar í efnahagskreppu, en síendurtekin skerðing á kjörum dómara geti grafið undan sjálfstæði þeirra. Þá bendir félagið á að álag á dómstóla hafi ekki minnkað, dómurum hafi ekki fjölgað og þeir hafi ekki notið sambærilegrar styttingar vinnutíma og aðrir hópar á vinnumarkaði.