Dýraverndarsamband Íslands (DÍS) segir það vera alvarlegt dýravelferðarmál að hundruðum minka hafi verið sleppt úr loðdýrabúi í Mosfellsdal og varar við afleiðingum fyrir bæði lífríki og dýrin sjálf.
Í yfirlýsingu sambandsins kemur fram að minkar séu afkastamikil rándýr og að sá mikli fjöldi sem var sleppt geti valdið verulegum skaða á lífríki svæðisins, ekki síst fuglalífi.
Jafnframt bendir DÍS á að verknaðurinn geti haft alvarleg áhrif á velferð minkanna sjálfra.
„Þessi verknaður varðar einnig velferð minkanna sjálfra þar sem dýr sem hafa verið alin innandyra geta reynst bjargarlaus í náttúrunni,“ segir í yfirlýsingunni.
Sambandið tekur undir hvatningu Matvælastofnunar um að dýraeigendur gæti öryggis dýra sinna og hvetur jafnframt almenning til að halda sig frá leitarsvæðinu.
„Fólk er hvatt til að fara ekki á svæðið í þeim tilgangi að taka þátt í leit eða föngun minkanna. Sú vinna er alfarið á ábyrgð og á vegum fagaðila sveitarfélagsins,“ segir þar.
Dýraverndarsambandið leggur jafnframt áherslu á að allar aðgerðir vegna minkanna verði framkvæmdar á mannúðlegan hátt og að aflífun, þar sem hún reynist óhjákvæmileg, fari fram í samræmi við lög um velferð dýra.
Lögregla rannsakar nú málið og hefur enn ekki staðfest hver eða hverjir stóðu að því að sleppa minkunum eða hver tilgangurinn var.
Að lokum segir DÍS að ef verknaðurinn hafi verið framinn í nafni dýravelferðar sé hann til þess fallinn að skaða málstað dýraverndar.
„Dýraverndarsambandið vill árétta að hafi verið um að ræða aðgerð í nafni dýravelferðar skaðar slíkt aðeins málstað dýra. Sambandið styður ekki slíka nálgun.“
