Utanríkisráðuneytið tilkynnti í gær að íslensk stjórnvöld og framkvæmdastjórn Evrópusambandsins hefðu skrifað undir viljayfirlýsingu um að framlengja sérlausn Íslands er varðar losunarheimildir til ársins 2030, en það eru þau gjöld sem fyrirtæki greiða fyrir hvert tonn af koltvísýringi sem þau hyggjast losa út í andrúmsloftið.

Bjarnheiður Hallsdóttir formaður Samtaka ferðaþjónustunnar segir í opinberri færslu að það sé gott að tímabundin sérlausn Íslands vegna losunarheimilda Evrópusambandsins hafi verið framlengd til ársins 2030.

„Það er auðvitað ánægjulegt að undanþágan hafi verið framlengd, en auðvitað er ekkert annað en varanleg undanþága ásættanlegt fyrir Ísland. Það er eitt stærsta hagsmunamál íslenskrar ferðaþjónustu og samgangna til og frá landinu. Það er svo einfalt.“

Forstjóri Icelandir ekki eins jákvæður

Bogi Nils Bogason forstjóri Icelandair segir í frétt á Vísi að fyrirtækið vonist aftur á móti eftir því að varanleg lausn finnist og vilji kalla eftir því að alþjóðlegu losunarheimildakerfi verði komið á fót.

Íslenska sérlausnin hefur verið í gildi frá 2023 og gengur út á það að í stað þess að íslensk flugfélög bjóði í loftslagsheimildir á uppboði eins og flugfélög annars staðar fá íslensk stjórnvöld að úthluta heimildum ókeypis til flugfélaga.

„Evrópusambandið er að vinna með staðbundna lausn á alþjóðavandamáli og það hefur neikvæð áhrif á samkeppnishæfni evrópskra flugfélaga.“

Bogi vill innleiða alþjóðlegt kerfi.

„Fluggeirinn hefur talað fyrir því að Evrópusambandið og heimurinn allur vinni að því að innleiða alþjóðlegt kerfi því að flugrekstur er alþjóðlegur og flug getur auðveldlega færst til á milli svæða eða álfa þar sem kostnaður er lægri.“