Lögreglan á höfuðborgarsvæðinu hafði í nógu að snúast á tímabilinu frá klukkan 05:00 til 17:00 í dag, en alls voru 118 mál skráð í kerfum hennar.

Tilkynnt var um nokkur innbrot, bæði í heimahús og annars staðar, og eru þau mál öll í rannsókn. Þá bárust tilkynningar um þjófnaði úr verslunum og af einkaeignum, þar á meðal af sólpalli við heimahús. Í einu tilviki var einstaklingur handtekinn grunaður um þjófnað og slagsmál í verslun. Sá var vistaður í fangaklefa, en verður yfirheyrður síðar í dag og sleppt að því loknu.

Lögreglu barst einnig tilkynning um einstakling sem sást sveifla exi. Þrátt fyrir umfangsmikla leit fannst viðkomandi ekki á vettvangi eða í nágrenni.

Tvö umferðaróhöpp voru tilkynnt á tímabilinu. Í öðru tilvikinu var ekið á barn á reiðhjóli, en samkvæmt upplýsingum frá vettvangi slasaðist enginn. Í hinu óhappinu varð einungis minni háttar tjón á bifreiðum og engin slys á fólki.

Þá voru tveir ökumenn stöðvaðir, grunaðir um akstur undir áhrifum fíkniefna. Málefni þeirra eru í hefðbundnu ferli hjá lögreglu.