Það er vaxandi áhyggjuefni hversu margir ferðamenn reyna að aka á óviðeigandi bílaleigubílum inn á hálendið. Þetta getur skapað mikla hættu og breytt fríinu í fjárhagslega martröð.

Í opinberri færslu inn í hópnum Bakland ferðaþjónustunnar birtir ferðamaður sem virkar mjög sáttur með sitt ferðalag myndir af bílaleigubílnum sínum föstum út í miðri á og ofan á hrauni í Landmannalaugum.

Víst er að ævintýrið mun kosta manninn heilmikið og nefndi einn í athugasemd við færsluna að: „Það er greinilega búið að opna inní Landmannalaugar og ævintýrin byrjuð. Mig minnir að einhver forsprakki tryggingafélaganna hafi sagt að tjón á bílaleigubílum sé áætlað um 40 milljarða á ári.“

Markús Einarsson segir í athugasemdum:

„Það er ekki bannað að vera fáviti. En það kostar, “ og segir Knútur E. Knudsen alls ekki vera ánægður með þróunina:

„Svo fara þessir bílar á bílasölu og seldir Íslendingum,“ þá er Sunna hálfbuguð og segir:

„og gamanið er byrjað.“

Harðbannað að aka hefðbundnum fólksbifreiðum án fjórhjóladrifs

Það má keyra inn í Landmannalaugar þegar Vegagerðin opnar hálendisvegina á sumrin, sem er að jafnaði frá miðjum júní og fram í miðjan september. Vegirnir eru lokaðir og ófærir allan veturinn og vorin vegna snævar og aurbleytu. Nákvæm opnun fer svo algjörlega eftir veðri, snjóalögum og ástandi veganna hverju sinni.

Þá er vegfarendum bent á að harðbannað sé að aka hefðbundnum fólksbifreiðum án fjórhjóladrifs (2WD) inn á hálendissvæðið við Landmannalaugar. Vegir sem liggja að svæðinu eru flokkaðir sem F-vegir, þar sem lögum samkvæmt er einungis leyfilegt að aka fjórhjóladrifnum ökutækjum (4x4) með góða veghæð.

Eftirfarandi reglur og öryggisráðstafanir gilda um ferðalög á svæðinu:

• Lögboðin ökutæki: Akstur á vegum eins og F208 og F225 krefst fjórhjóladrifs til að takast á við grófa malarvegi, djúpar skorningar og óbrúaðar ár.
• Bílaleigubílar: Almennir leigusamningar bílaleiga banna með öllu akstur tvíhjóladrifinna bíla á F-vegum. Brot á þeim reglum fella allar tryggingar úr gildi og varða háum sektum.
• Aðrir ferðamátar: Þeir sem ferðast á fólksbílum geta lagt land undir fót með því að nýta áætlunarbíla (hálendisrútur) eða lagt bifreiðum sínum á merktum bílastæðum áður en komið er að óbrúuðum ám og gengið síðasta spöl þaðan.
• Mikilvæg vöktun: Hálendisvegir eru lokaðir yfir vetrartímann og aðstæður breytast hratt á sumrin. Ferðafólk er hvatt til að kynna sér ástand vega á Umferðin.is og öryggisviðvaranir á SafeTravel Iceland áður en lagt er af stað.