Héraðsdómur Reykjavíkur hefur dæmt tvo menn til fangelsisvistar fyrir tilraun til stórfellds fíkniefnalagabrots vegna innflutnings á rúmu kílói af kókaíni sem falið var í steyptu borði og sent til Íslands frá Bandaríkjunum með póstsendingu árið 2024.
Annar mannanna, Audrius Ablingis, var dæmdur í 20 mánaða fangelsi en Jonas Mockevicius hlaut 18 mánaða fangelsisdóm.
Samkvæmt ákæru og niðurstöðu dómsins stóðu mennirnir saman að innflutningi á 1.003,59 grömmum af kókaíni sem hafði mjög mikinn styrkleika. Fíkniefnin voru ætluð til dreifingar hér á landi í ágóðaskyni. Tollgæsla stöðvaði sendinguna við komuna til landsins og lögregla fjarlægði fíkniefnin áður en sendingin var afhent. Í staðinn var komið fyrir gerviefnum ásamt eftirfarar- og hlustunarbúnaði.
Dómurinn rekur að skráður móttakandi hafi sótt sendinguna á pósthús í Reykjavík 4. september 2024 og flutt hana á bifreiðaverkstæði við Eldshöfða. Þaðan sótti Ablingis pakkann og fór með hann í bílskúr við Álfheima sem hann hafði á leigu ásamt Mockevicius.
Lögregla fylgdist með ferðum mannanna þann dag og taldi hegðun þeirra bera með sér að þeir væru mjög varir um sig. Meðal annars fóru þeir í akstur til að kanna hvort fylgst væri með þeim og sneru síðar aftur á reiðhjólum til að nálgast bílskúrinn. Þegar þeir opnuðu pakkann náðist hljóðupptaka úr búnaði lögreglu þar sem tveir menn ræddu saman um innihald sendingarinnar og þann búnað sem þar fannst.
Mockevicius neitaði sök og hélt því fram að hann hefði ekki vitað hvað væri í sendingunni. Dómurinn taldi þó sannað að hann hefði fylgst með ferðum pakkans og tekið virkan þátt í framkvæmd brotsins. Þá þótti það einnig þungt vega að hann lagði á flótta þegar lögregla hafði afskipti af honum.
Mennirnir voru jafnframt dæmdir til að greiða verulegan sakarkostnað og málsvarnarlaun verjenda sinna.
