Lögregla sinnti fjölda útkalla á höfuðborgarsvæðinu þar sem meðal annars komu upp mál tengd ölvun, ofbeldi, þjófnaði og slysum við vinnu.
Í hverfi 105 var ölvuðum aðila vísað á brott eftir að hann hafði komið sér fyrir í kjallara fjölbýlishúss. Þá var lögregla kölluð til í miðbænum þegar maður fékk raflost við vinnu sína. Ekki liggja fyrir frekari upplýsingar um líðan mannsins.
Einnig var óskað eftir aðstoð lögreglu að skemmtistað í miðbænum vegna manns sem var til vandræða. Þegar lögregla hafði afskipti af manninum brást hann illa við, braut rúðu í lögreglubifreið og réðst á lögreglumann. Maðurinn var handtekinn og vistaður í fangaklefa.
Einstaklingur var handtekinn þar sem hann var í mjög annarlegu ástandi. Var hann vistaður í fangaklefa þar sem ekki var unnt að koma honum í annað húsaskjól.
Þá var maður stunginn fyrir utan skemmtistað í miðbænum. Ekki liggja fyrir upplýsingar um alvarleika áverka hans, en hann var fluttur á slysadeild til aðhlynningar. Gerandi flúði af vettvangi og er hans leitað.
Í Hafnarfirði var víðáttölvaður aðili handtekinn eftir að hafa tálmað störf lögreglu og vistaður í fangaklefa. Í Breiðholti var annar einstaklingur handtekinn vegna annarlegs ástands af völdum ölvunar og fíkniefna.
Lögregla hafði jafnframt afskipti af tveimur ungum drengjum í Kópavogi sem grunaðir voru um að hafa reynt að brjótast inn í bifreiðar. Málið var afgreitt með aðkomu foreldra og barnaverndaryfirvalda.
Í Grafarvogi var óskað eftir aðstoð lögreglu í verslun vegna þjófnaðar. Þá var lögregla kölluð til í íbúð í Árbænum vegna óláta og slagsmála, en tókst að stilla til friðar á vettvangi.
Loks voru tveir aðilar handteknir vegna líkamsárásar. Brotaþoli var fluttur á slysadeild með sjúkrabifreið til aðhlynningar.
