Nokkur hundruð minkar sluppu úr minkabúinu Dalsbúi í Mosfellsdal snemma í morgun eins og fram kom í frétt Mannlífs en lögreglan hefur nú sent fjölmiðlum upplýsingar um að skotvopnum verði beitt við að fanga dýrin síðar í dag.

Lögreglu barst tilkynning um strok minkanna laust eftir klukkan sjö í morgun. Ekki liggur enn fyrir hvernig þeim tókst að komast út og er rannsókn málsins á frumstigi.

Viðeigandi yfirvöld og eftirlitsstofnanir hafa verið upplýst um atvikið og hafa þegar brugðist við.

Vegna aðgerða við að handsama minkana verður skotvopnum beitt í Mosfellsdal í dag. Af þeim sökum má búast við að íbúar og vegfarendur á svæðinu heyri skothvelli.

Lögreglan segir ekki unnt að veita frekari upplýsingar um málið að svo stöddu.