Óhætt er að segja að nýleg færsla þingmanns Sjálfstæðisflokksins, Jóns Péturs Zimsen, á samfélagsmiðlinum X, hafi ýft fjaðrir margra. Þar talar hann um geðheilsu ungra kvenna og nefnir fjölgun kvenna í stjórnunarstöðum og í háskólanámi í sömu andrá. Færslan hljóðar í heild sinni á eftirfarandi hátt:
„Geðheilsa ungra kvenna, 15–25 ára er á hrikalegum stað í dag þrátt fyrir að hvergi í heiminum búi þær við meira jafnrétti. Rúmur helmingur þeirra telur andlega heilsu sína EKKI góða og fer versnandi. Sl. áratugi hefur konum fjölgað verulega í flestum stjórnunarstöðum samfélagsins og eru í miklum meirihluta háskólanema samhliða því að frjósemi minnkar og skilnuðum fjölgar. Í upplýsingum landlæknis er þessi hópur sá sem stendur verst allra hópa samfélagsins, hvað geðheilbrigði varðar. Þetta er umhugsunarefni fyrir okkur öll og tími til kominn að skoða hvað það er sem veitir okkur lífsfyllingu og tilgang. Við bælum ekki niður árþúsunda náttúruval vegna skoðana framsækinna háskólamanna af hugvísindadeildum. Minnkum áherslur á umbúðir, hamstrahjólið og firringu okkar allra vegna. Njótum þess að tengjast okkar nánustu. Það er það sem gefur lífinu tilgang og er drifkraftur hamingju.“
Helga Vala Helgadóttir, lögmaður og fyrrverandi þingkona Samfylkingarinnar skrifaði færslu um orð Jóns og segir að það væri „fróðlegt að heyra afstöðu“ flokkssystra Jóns, þeirra Bryndísar Haraldsdóttur og Hildar Sverrisdóttur.
Fjölmargir nafntogaðir einstaklingar sem og aðrir skrifa athugasemd við færslu Helgu Völu og þykir mörgum sem færsla Jóns lykti af stækri karlrembu.
Fyrrverandi þingkona Framsóknarflokksins, Halla Signý Kristjánsdóttir skrifaði kaldhæðna athugasemd:
„Við erum hamingjusamastar bak við eldavélina, það er niðurstaðan,“ skrifaði hún og vakti lukku lesenda.
Egill Helgason fjölmiðlamaður tekur í sama streng og Halla Signý og segir: „Vá! Farið nú aftur bak við eldavélina!“
Fréttaritarinn Jóhann Hlíðar Harðarson skrifaði líka athugasemd. Hún var stutt en beint að efninu.
„Hvaða djöflasýra er þetta?“
Drífa Snædal, talskona Stígamóta benti á að Jón eigi sæti í framtíðarnefnd Alþingis.
„Þessi maður á sæti í framtíðarnefnd Alþingis. Við verðum allar hamingjusamar heimavinnandi að hugsa um karla, börn og gamalmenni í framtíðinni í ólaunaðri umönnun - af því það er svo yndislegt.“
Jódís Skúladóttir, fyrrverandi þingkona Vinstri grænna skrifaði einnig athugasemd og það í kaldhæðna kantinum:
„Hvað á að gera við lessurnar? Og er ok að hlekkja sig frekar við air-fryerinn? Er að spyrja fyrir vinkonu….“
Illug Jökulsson fjölmiðlamaður sér ekkert fyndið við færslu Jóns og skrifar athugasemd þar sem hann segir einmitt það. Því er hins vegar baráttukonan og amma Snorra Mássonar, Helga Kress ósammála: „Þetta er nú svolítið fyndið: "Af hugvísindadeildum"!!! Hvaðan kemur hann þessi!“
Hallgrímur Helgason, rithöfundur og málari telur sig hafa fundið ástæðuna fyrir færslu Jóns:
„Hann datt í sjóinn og líkamshitinn fór niður í 32 gráður, IQ virðist hafa fallið líka.“
Lengstu athugasemdina á Grímur Atlason, framkvæmdarstjóri Geðhjálpareiginmaður og eiginmaður Helgu Völu en hann setur færslu Jóns í sögulegt samhengi:
„Hitler veitti konum sem voru duglegar að eiga börn sérstaka orðu: Heiðursmerki hinnar þýsku móður (þ. Mutterkreuz) en það fengu konur sem eignuðust mörg börn. Heiðursmerkið var þríþætt: brons fyrir fjögur til fimm börn, silfur fyrir sex til sjö og gull fyrir átta eða fleiri börn. Þetta var hluti af stefnu stjórnvalda til að hvetja til fólksfjölgunar og styrkja "þýska þjóðarstofninn“
Stalín tók þetta upp þegar hann var búinn að leysa "Kvennavandamálið". Árið 1944 var byrjað að veita heiðursorðuna: Móðir hetja (rúss. Мать-героиня). Þessa orðu fengu konur sem höfðu eignast tíu börn eða fleiri.
Hljótum að fara að sjá Fjallkonumeistarakrossinn fyrir íslenskar (alvöru íslenskar) konur sem kjósa að vera heima yfir 3-10 börnum. Hafa þetta í brons, silfri, gulli og demanti (taka þetta alla leið) eftir fjölda.
Framtíðin er í boði náttúruvals.“
