Lögreglan á höfuðborgarsvæðinu hafði í nógu að snúast í gærkvöldi og í nótt og sinnti fjölbreyttum verkefnum, meðal annars vegna umferðarlagabrota, fíkniefnamála, skemmdarverka og útkalla vegna ónæðis.
Ökumaður var stöðvaður þar sem hann ók bifreið án skráningarmerkja. Þá var tilkynnt um skemmdarverk og rúðubrot, en málið telst upplýst.
Lögregla hafði einnig afskipti af manni í annarlegu ástandi sem hafði valdið ónæði við fjölbýlishús og var honum vísað á brott af vettvangi.
Nokkrir ökumenn voru stöðvaðir vegna alvarlegra umferðarlagabrota. Einn ökumaður var kærður fyrir akstur án ökuréttinda og reyndist það hvorki vera í fyrsta né öðru skipti sem hann var stöðvaður vegna slíks brots. Þá voru tveir ökumenn til viðbótar stöðvaðir grunaðir um akstur undir áhrifum fíkniefna.
Lögregla hafði einnig afskipti af stúlku undir 18 ára aldri sem reyndist vera með fíkniefni í fórum sínum. Málið var afgreitt með aðkomu foreldra og barnaverndar.
Tilkynning barst um ungmenni á svokölluðum „krossurum“ sem óku innan um börn á leiksvæði. Þegar ungmennin urðu vör við lögreglu óku þau á brott, en lögregla segist hafa upplýsingar um heimilisföng að minnsta kosti hluta þeirra sem málið varðar.
Annar ökumaður var stöðvaður án ökuréttinda, í annað sinn, og grunaður um akstur undir áhrifum fíkniefna.
Þá var maður handtekinn grunaður um akstur undir áhrifum fíkniefna, vörslu á talsverðu magni fíkniefna og peningaþvætti, auk annarra brota. Hann var vistaður í fangageymslu vegna rannsóknar málsins.
Lögregla gerði jafnframt athugasemd við rekstur snyrtistofu sem virðist ekki hafa verið í samræmi við gildandi lög og reglur. Málið tengist rannsókn sem áður hafði verið til umfjöllunar.
Einn ökumaður var sviptur ökuréttindum til bráðabirgða eftir að hafa mælst á 124 km hraða á klukkustund á svæði þar sem hámarkshraði er 50 km/klst. Annar ökumaður var kærður vegna svigaksturs.
Töluvert viðbragð var sett af stað vegna brunakerfis og brunalyktar, en þegar að var komið reyndist orsökin vera brauðrist.
Loks var ökumaður stöðvaður grunaður um akstur undir áhrifum fíkniefna. Sá reyndist einnig sviptur ökuréttindum og með fíkniefni í fórum sínum.
Annar ökumaður var kærður fyrir akstur án ökuréttinda og hafði hann samkvæmt upplýsingum lögreglu aldrei öðlast ökuréttindi. Telst það vera í „þriðja sinn eða oftar“ flokki slíkra brota hjá viðkomandi.
Þá var einn ökumaður stöðvaður fyrir of hraðan akstur eftir að hafa mælst á 116 km hraða á klukkustund þar sem hámarkshraði var 80 km/klst.
