Gréta María Grétarsdóttir, fyrrverandi framkvæmdastjóri Prís og Krónunnar, hefur stofnað nýtt ráðgjafarfyrirtæki undir nafninu Svarta mamban consulting ehf. en greint er frá þessu í Lögbirtingablaðinu.

Félagið var stofnað í byrjun ágúst og er Gréta María eini stjórnarmaður þess, auk þess sem hún gegnir stöðu framkvæmdastjóra og fer með prókúruumboð. Jón Viðar Ágústsson er varamaður í stjórn.

Samkvæmt skráðum tilgangi félagsins mun það veita fyrirtækjum, stofnunum og einstaklingum ráðgjöf á sviði stefnumótunar, skipulags, stjórnunar, fjármála og rekstrar. Þá er félaginu heimilt að sinna fræðslu og námskeiðahaldi, fjárfestingum, eignarhaldi og rekstri fasteigna og lausafjár auk lánastarfsemi sem tengist rekstrinum.

Gréta María hætti óvænt sem framkvæmdastjóri lágvöruverslunarinnar Prís á síðasta ári. Hún hafði stýrt félaginu frá því verslunin opnaði í ágúst 2024 en þar áður var hún forstjóri Heimkaupa.

Gréta María er menntuð véla- og iðnaðarverkfræðingur og starfaði áður í bankageiranum. Árið 2016 tók hún við sem framkvæmdastjóri Krónunnar og gegndi starfinu í fjögur ár.