Alma D. Möller hefur skipað Guðjón Hauksson í embætti forstjóra Sjúkrahússins á Akureyri til næstu fimm ára frá og með 1. júní en greint er frá þessu í tilkynningu frá stjórnvöldum

Embættið var auglýst laust til umsóknar í febrúar og byggir ákvörðun ráðherra á mati ráðgefandi hæfnisnefndar sem taldi Guðjón hæfastan umsækjenda.

Guðjón hefur yfirgripsmikla reynslu af stjórnun og þróun heilbrigðisþjónustu. Hann er menntaður hjúkrunarfræðingur frá Háskóla Íslands og hefur einnig lokið meistaragráðu í rannsóknum á heilbrigðisþjónustu frá Boston University School of Public Health auk meistaragráðu í heilsuhagfræði frá Háskóla Íslands.

Frá árinu 2017 hefur Guðjón gegnt stöðu forstjóra Heilbrigðisstofnunar Austurlands. Þar áður starfaði hann meðal annars sem deildarstjóri innan stofnunarinnar. Þá hefur hann einnig sinnt störfum hjá Lyfjagreiðslunefnd, heilbrigðisráðuneytinu og á Landspítala.

Í áliti hæfnisnefndar kemur fram að Guðjón hafi aflað sér víðtækrar þekkingar á íslenska heilbrigðiskerfinu í gegnum störf sín og búi yfir reynslu af rekstri, fjármálastjórnun, mannauðsmálum og opinberri stjórnsýslu.

Samhliða ráðningunni hefur verið greint frá því að starf forstjóra Heilbrigðisstofnunar Austurlands verði auglýst laust til umsóknar á næstunni.