Jón Viðar Jónsson, leikhús- og samfélagsrýnir fer fremstur í flokki fólks sem nú hæðist að frétt Morgunblaðsins frá í morgun en þar er sagt frá „dulurfullum ljósbletti“ sem náðist á ljósmynd í Barkárdal.

Fjölmargir skrifuðu athugasemd við frétt mbl.is af því sem lýst er sem „dularfullum ljósbletti“ sem náðist í Barkárdal en flestum þykir nokkuð augljóst að um sé að ræða endurspeglun á linsu. Í fréttinni er reyndar rætt við Pál Stefánsson ljósmyndara sem telur einmitt að um slíkt sé að ræða. Það kemur þó ekki í veg fyrir hæðnislegar athugasemdir við fréttina.

Árni Tryggvarson skrifar til að mynda: „Með ólíkindum að ljósmyndarar á Morgunblaðinu (kannski er líka búið að reka þá alla) hafi ekki verið spurðir álits áður en þetta grín var sett á miðilinn. Hver einasti maður með vott af þekkingu á ljósmyndum veit að þetta er sk. „flare“ eða ljósbrot í linsunni.“

Stefán H. Kristinsson tjáir sig líka: „Er engin eftir á mogganum sem hefur eitthvað smá vit á ljósmyndun?“

Þá spyr Sigurþór Hjörleifsson: „Kallast þetta ekki bara sól?“

Jón Viðar Jónsson, leikhúsgagnrýnandi gekk þó skrefinu lengra en aðrir og skrifaði heila Facebook-færslu um fréttina. Þar fullyrðir hann að það sé svokölluð gúrkutíð hjá Morgunblaðinu. Spyr hann einnig hvort blaðamenn hafi ekkert ímyndunarafl lengur.

„Ansi mikil gúrkutíð á Mogganum! En auðvitað er mun líklegra að þetta sé FFH (UFO) eða eitthvað þess háttar en eitthvað svo óskáldlegt og prósaískt eins og þeir halda: endurspeglun á linsu. Aldrei má neitt vera dularfullt og yfirnáttúrulegt í friði. Svo dettur þeim auðv ekki í hug að þetta gætu verið linsuljós frá huldufólkinu sem dalurinn er ugglaus fullur af. Hafa blaðamenn ekkert hugarflug lengur?“

Til gamans má geta að téð frétt er þegar þetta er skrifað níunda mest lesna fréttin á mbl.is í dag, þannig að einhverjir hafa þó áhuga á henni.