675 sóttu um alþjóðlega vernd fyrstu sex mánuði ársins. Þetta má sjá í mælaborði ríkislögreglustjóra sem er aðgengilegt á vef dómsmálaráðuneytisins. Mælaborðið er uppfært reglulega. Langflestar umsóknir eru frá Úkraínu líkt og undanfarin ár.
Fjöldinn er í takt við fyrstu sex mánuði síðasta árs þegar umsækjendur voru 605. Umsóknum um alþjóðlega vernd hefur fækkað töluvert síðustu misseri. Til að mynda sóttu 1.122 um alþjóðlega vernd fyrstu sex mánuði ársins 2024.
74 prósent umsókna fyrstu sex mánuði ársins voru frá Úkraínu, 11 prósent frá Venesúela og 6 prósent frá Palestínu. Þetta er svipað og á síðasta ári. Frá árinu 2022 hafa nær átta af hverjum tíu umsóknum um alþjóðlega vernd verið frá Úkraínu eða Venesúela.
Á afstöðnu þingi voru fjögur frumvörp tengd útlendingamálum samþykkt á Alþingi. Má þar nefna lög um afturköllun verndar og lög um brottfararstöð. Þá voru gerðar breytingar vegna landamæranna með Schengen-samstarfinu og reglur um dvalarleyfi hertar.
Á komandi þingi er fyrirhugað að leggja fram fleiri mál tengd málaflokknum, til að mynda heildarendurskoðun á reglum útlendingalaga um dvalarleyfi. Breytingarnar færa íslenska löggjöf nær því regluverki sem þekkist á Norðurlöndum.
