Lögreglan sinnti fjölbreyttum verkefnum í umdæminu í gærkvöldi og í nótt, meðal annars vegna umferðarlagabrota, heimilisofbeldis og hótana.
Töluverð umferð var hjá lögreglu vegna ökumanna sem óku án gildra ökuréttinda. Einn ökumaður var stöðvaður réttindalaus og jafnframt grunaður um ólöglega atvinnustarfsemi. Þá var annar ökumaður stöðvaður grunaður um akstur undir áhrifum fíkniefna. Reyndist það vera í þriðja sinn eða oftar sem viðkomandi er kærður fyrir akstur án réttinda og var bifreiðin því haldlögð vegna ítrekaðra brota.
Lögregla hafði einnig afskipti af sviptum ökumanni og bendir rannsókn til þess að um annað brot hans af sama toga sé að ræða. Þá var annar ökumaður kærður fyrir akstur án ökuréttinda, en sá hafði aldrei öðlast ökuréttindi. Var þetta í fjórða sinn sem hann er kærður fyrir slíkt brot. Barn var farþegi í bifreiðinni og var barnavernd tilkynnt um málið.
Tveir ökumenn voru stöðvaðir grunaðir um akstur undir áhrifum áfengis og/eða fíkniefna. Í öðru tilvikinu var ökumaður handtekinn eftir að hafa neitað að framvísa skilríkjum að kröfu lögreglu.
Lögreglu barst einnig tilkynning um umferðarslys þegar bifreið var ekið utan í vegrið. Í öðru tilvikinu urðu minniháttar meiðsli, en í hinu var bifreiðin ökufær og engin slys á fólki.
Eitt heimilisofbeldismál er til rannsóknar hjá lögreglu. Þá sinnti lögregla einnig útkalli vegna hótana sem bárust.
Að auki bárust tilkynningar um ungmenni á torfæruhjólum, svokölluðum „krossurum“, sem voru sögð hafa valdið spjöllum á grassvæði með akstri sínum. Var þeim fylgt eftir með drónum.
