Helgi Bjartur Þorvarðarson hefur verið dæmdur í 12 mánaða fangelsi fyrir brot gegn tíu ára dreng í Hafnarfirði, en níu mánuðir refsingarinnar eru skilorðsbundnir.

Karl Ingi Vilbergsson, settur varahéraðssaksóknari, staðfesti niðurstöðuna í samtali við Vísi.

Helgi Bjartur var ákærður fyrir að hafa nauðgað tíu ára dreng í september á síðasta ári með því að eiga við hann önnur kynferðismök en samræði og einnig fyrir tilraun til samræðis. Að auki var hann ákærður fyrir að hafa greitt fyrir vændi sama kvöld.

Hann hafði gengið laus frá því hann var handtekinn vegna málsins. Þegar rannsókn lögreglu lauk í janúar ákvað Héraðssaksóknari að fara fram á gæsluvarðhald yfir honum.

Samkvæmt Vísi var hann ekki sakfelldur fyrir að nauðga drengnum heldur fyrir kynferðislega áreitni.