Fagstjóri veðurs og loftslags á Veðurstofu Íslands, Halldór Björnsson, telur að ef önnur hitabylgja mjakaði sér hingað til lands síðar í sumar, álíka þeirri er átti sér stað á Íslandi í maí síðastliðnum, myndi hitastig að öllum líkindum fara yfir 30 gráðurnar á einhverjum stöðum á Íslandi, en þetta kom fram á mbl.is.
Halldór talaði um hitabylgjuna er varð á Íslandi og Grænlandi í maí, á vefkynningu á vegum World Weather Attribution á rannsókn er hópur vísindamanna hjá Grantham stofnuninni í London gerði á hitabylgjunni.
Í máli áðurnefnds Halldórs kom fram að eðlilega væri afar takmörkuð spá- og forspárgeta til staðar til þess að spá fyrir um hvað geti mögulega gerst seinna í sumar hér á landi.
Vísaði Halldór í að svæðisbundnar loftslagsmiðstöðvar hafi reynt að spá fyrir um veðrið í sumar en með takmörkuðum árangri.
Þessar spár gera ráð fyrir hlýrra loftslagi á Íslandi í sumar en sem nemur meðaltali síðustu ára.
Hann tekur það þó fram skýrt að þá séu hitabylgjur ekki teknar með í þessu:
„Mestu hitabylgjurnar verða hér í júlí og ágúst en hiti á Íslandi nær yfirleitt hámarki í kringum 20. júlí og nokkrum vikum síðar við norðurströndina. Hitabylgjur á þessum árstíma eru miklu ákafari, og ef sams konar eða álíka hitabylgja ætti sér stað á þeim tíma myndum við líklega sjá hitastig fara yfir 30 á sumum stöðum.“
