Inga Sæland, mennta- og barnamálaráðherra, undirritaði í dag reglugerð um notkun síma og snjalltækja á skólatíma í grunnskólum og á frístundaheimilum. Með reglugerðinni eru í fyrsta sinn settar samræmdar reglur um símabann í grunnskólum landsins.
Markmið reglugerðarinnar er að auka námsfrið, efla vellíðan og félagsleg tengsl barna og stuðla að jákvæðum skólabrag. Reglugerðin kemur í kjölfar lagabreytingar sem Alþingi samþykkti fyrr á árinu.
„Börnin okkar eiga rétt á því að skólinn sé staður þar sem þau geta einbeitt sér, talað saman, leikið sér og notið samveru án stöðugs áreitis frá símanum,“ segir Inga. Hún segir símabann ekki snúast um að snúa baki við tækninni heldur að setja velferð barna í fyrsta sæti.
Samkvæmt reglugerðinni verður notkun síma og snjalltækja, sem ekki eru í eigu eða umsjá skóla eða frístundaheimilis, óheimil á skólatíma. Tækin skulu ekki vera aðgengileg nemendum og verða geymd samkvæmt fyrirkomulagi sem hver skóli eða frístundaheimili ákveður.
Reglurnar taka til alls skólatímans, þar á meðal frímínútna, matarhléa, vettvangsferða og annarra ferða á vegum skólans. Þær ná einnig til frístundaheimila og tómstunda- og félagsstarfs sem telst hluti af daglegu skólastarfi.
Undanþágur verða þó heimilar þegar notkun tækis er nauðsynleg vegna heilsufars, fötlunar, sérþarfa eða námsþarfa nemenda. Þá verður áfram heimilt að nota síma og snjalltæki í eigu eða umsjá skóla þegar það þjónar kennslufræðilegum tilgangi.
Skólastjórar bera ábyrgð á innleiðingu reglnanna í grunnskólum og forstöðumenn frístundaheimila á sínum vettvangi. Nemendur skulu fá tækifæri til að taka þátt í innleiðingunni og taka skal tillit til sjónarmiða þeirra eftir aldri og þroska.
Reglugerðin verður birt í Stjórnartíðindum á næstu dögum og öðlast þá gildi. Mennta- og barnamálaráðuneytið hyggst jafnframt gefa út leiðbeiningar um framkvæmdina í samráði við Samband íslenskra sveitarfélaga og skólasamfélagið.
Ráðuneytið mun fylgja framkvæmd reglugerðarinnar sérstaklega eftir frá 1. janúar 2027 og verður hún síðar endurskoðuð með hliðsjón af reynslu skólanna og þróun rannsókna á þessu sviði.
