Svokallaðri kærleiksherferð verður hrint af stað síðdegis og er markmiðið að safna fyrir Bryndísarhlíð, sem er nýtt geðheilbrigðisúrræði fyrir börn sem eru þolendur ofbeldis.
Kærleiksherferðin er kennd við Bryndísi Klöru Birgisdóttur, sem lést eftir hnífaárás á Menningarnótt á síðasta ári.
Kærleiksherferðin miðast að söfnun fyrir húsnæði fyrir Bryndísarhlíð, en það mun hýsa geðheilbrigðisþjónustu fyrir börn sem eru þolendur ofbeldis.
Fyrirhugað er að þjónusta Bryndísarhlíðar verði þverfagleg og verði sinnt af heilbrigðisstarfsfólki er hefur sérfræðiþekkingu hvað varðar málefni barna.
Átak þetta verður sett á laggirnar í Iðnó í kvöld klukkan 17:30, en þar mun Halla Tómasdóttir forseti Íslands ávarpa gesti og Alma Möller heilbrigðisráðherra mun kynna áform ráðuneytisins um stuðning við Bryndísarhlíð.
Sviðsstjóri lýðheilsusviðs hjá embætti landlæknis, Dóra Guðrún Guðmundsdóttir, situr í stjórn Minningarsjóðs Bryndísar Klöru.
Hún segir Bryndísarhlíð eiga að vera lágþröskuldaúrræði fyrir börn, sambærilegt og Bjarkarhlíð er fyrir fullorðna.
„Það er mikilvægt að þetta úrræði sé viðbót. Það komi ekki í staðinn fyrir eitthvað annað heldur nái til fleiri barna. Þannig að við grípum öll börn sem þurfa á aðstoð að halda, sem búa við ofbeldi, þannig að við komumst upp úr því en festumst ekki í einhverjum vítahring.“
Verkefnið er í þróun í samstarfi við stjórnvöld. Leitað verður leiða til að vinna betur að forvörnum gegn ofbeldi.
Stefan er því sú að Minningarsjóður Bryndísar Klöru safni fyrir húsnæði og stjórnvöld muni svo sjá um rekstur þjónustunnar.
„Ég tel svo mikilvægt að starfsemin verði tryggð áfram af hinu opinbera og sé hluti af kerfinu en standi ekki fyrir utan kerfið.“
Enn er ekki fullkomlega ljóst hver heildarkostnaðurinn muni verða, en þarfagreining stendur yfir. Greint verði frá niðurstöðu hennar síðar.
Það eru margir sem leggja verkefninu lið, með fjáröflun eða vitundarvakningu. Embla Bachman og Kári Einarsson, fyrrum skólafélagar Bryndísar Klöru, ætla til dæmis að fara í hringferð um landið og ætla að skapa svokallaðan kærleikshring.
Segist Dóra Guðrún finna mikinn meðbyr með verkefninu. Að stefnt sé að opnun Bryndísarhlíðar strax á næsta ári.
„Okkur dreymir um að fyrir lok næsta árs verði þetta komið af stað. Við finnum fyrir miklum meðbyr. Það hefur aldrei verið jafn auðvelt að leita til fólks, það eru allir að gefa vinnuna sína og allir tilbúnir að styðja þetta málefni. Við þurfum aukna samkennd og kærleika, að vinna gegn ofbeldi og við þurfum þetta úrræði.“
