Nýtt hneykslismál virðist í uppsiglingu í Noregi, en samkvæmt fjölmiðlum þar virðist Mette-Marit, krónprinsessa ekki sú eina úr hirðinni sem hafði tengsl við Jeffrey Epstein.

Hákon krónprins Noregs er sagður hafa haft tengsl við fólk úr tengslaneti hins dæmda kynferðisbrotamanns Jeffrey Epstein, að því er norska slúðurblaðið Se og Hør greinir frá.

Undanfarnar vikur hefur Mette-Marit krónprinsessa verið í brennidepli umræðunnar um Epstein, en krónprinsinn sjálfur hefur lítið tjáð sig. Nú heldur blaðið því fram að hann hafi einnig haft tengsl við þetta umhverfi.

Samkvæmt Se og Hør er til ljósmynd frá einkasamkvæmi í París þar sem krónprinsinn sést ásamt nokkrum einstaklingum sem tengjast Epstein-hringnum. Mette-Marit var ekki viðstödd það samkvæmi.

Þegar VG spurði krónprinsinn út í málið í heimsókn hans til Møre og Romsdal vildi hann ekki tjá sig frekar. „Nú erum við komin aftur að þessu, já. Ég ætla ekki að fara nánar út í það hér og nú,“ sagði hann.

Konungshöllin hefur enn ekki svarað fyrirspurnum Se og Hør um meint tengsl eða fundinn í París.

Málið kemur í kjölfar þess að Bandaríska dómsmálaráðuneytið birti skilaboð milli Mette-Marit krónprinsessa og Jeffrey Epstein, þar sem hún sagði meðal annars að „þetta liti ekki vel út“, ásamt broskalli.