Landssamband eldri borgara (LEB) mótmælir harðlega fyrirhuguðu komugjaldi í sjúkraþjálfun sem heilbrigðisráðherra hefur boðað að taki gildi 1. september. Samkvæmt áætluninni mun hver heimsókn kosta 1.000 krónur.
Í ályktun frá LEB segir að gjaldtakan muni gera stórum hópi eldra fólks erfiðara fyrir að sækja nauðsynlega sjúkraþjálfun, sérstaklega þeim sem þurfa á meðferð að halda oftar en einu sinni í mánuði.
Sambandið bendir á að margir eldri borgarar muni ekki ráða við aukinn kostnað og nefnir að um 20 prósent eldra fólks á Íslandi búi enn við tekjur sem séu undir lágmarkstaxta á almennum vinnumarkaði.
LEB gagnrýnir jafnframt stefnu ríkisstjórnarinnar og segir að í stað þess að byggja upp kerfi sem stuðli að sjálfstæði og bættri heilsu eldra fólks sé verið að auka fjárhagslegar byrðar þess.
„Við þurfum á því að halda þegar fjöldi eldra fólks í samfélaginu fer hækkandi að horfa til framtíðar og í lausnum sem þjóna samfélaginu til langs tíma. Það virðist vera stefna núverandi ríkisstjórnar að sverfa að eldra fólki í stað þess að leitast við að byggja upp kerfi sem styrkir eldra fólk til sjálfstæðis og betri heilsu,“ segir í ályktuninni.
Að lokum skorar Landssamband eldri borgara á heilbrigðisráðherra að endurskoða ákvörðunina og falla frá áformum um komugjaldið.
Ályktunin er undirrituð af Birni Snæbjörnssyni, formanni LEB, og Sigurði Á. Sigurðssyni, varaformanni sambandsins.
